Saturday, August 28, 2010

காற்புள்ளி...

மஞ்ச கலரு சிலாக்க
போட்டுக்க  எடுப்பா இருக்கும்
தலைக்கு எண்ணெய்
தடவி படிய சீவிக்கோடா
சுருள் முடிக்கும் அதுக்கும்
ராசா மாதிரி இருப்ப
பாழும் நெத்தியா போகாத
துண்ணூறு வச்சுக்கோ
என்ன புள்ள நீ,
வா வச்சு விடுறேன்
நெத்தி நெறைய! 
ஆத்தா மகமாயி
எம்புள்ள நல்லா இருக்கணும்
கை காலெல்லாம் எண்ணெய்
தடவி விடவும் செய்வார் அப்பா!
அம்மா இல்லாத
அப்பாவை பார்த்து கொள்ள
வைத்த செவிலிக்கு எல்லாம்
இது பற்றி தெரியாது
சொல்லவும் நேரமில்லை
எங்களுக்கு

Friday, August 20, 2010

மினுக்கட்டான்கள்...

இங்கிருந்து பார்த்த போது
அங்கே யாரும் இல்லை
அங்கேயிருந்து பார்த்தாலும்
அஃதே
***
ஒன்றும் ஒன்றும் இரண்டு
ஒன்றும் ஒன்றும் மூன்று
ஒன்றும் ஒன்றும்
ஒன்றுமில்லை
***
ஊன்றுகோல்
ஆணியில் தொங்கியது
தாத்தா உத்தரத்தில்
தொங்கிய பின்
***
பேப்பர் வீசும் பையன்
பேப்பரில் இருந்தான்
இன்னும் பேப்பர் வரலையா
அப்பா திட்டிக்கொண்டே
அலுவலகம் சென்றார்
***
குடையின் மேலே பெய்த
மழைத்துளிகளில்
பூத்துக்கிடக்கிறது குடைக்குள்ளே பூ

***