ஆல் போல் தழைத்து...

இறுக்கி கட்டிய
கூந்தலின் அடங்கா
பிரிகளென வழியும்
விழுதுகள்

கதிர்கள் நுழைந்து
தரையில் விழுந்து விடாது
அடர்ந்திருக்கும்
பச்சை கண்ணாடி இலைகள்

விரிந்த பாதங்கள்
கொண்ட வயசாளியின்
தெறித்த நரம்புகள் ஓடும்
உரமான கால்களாய்
நிலம் ஊன்றி தண்டு

உறவுக்கும் உதவிக்கும்
கரங்களாய்
நீண்ட கிளைகளில்
முடிச்சுகளென
உயிர்கருமுட்டைகள்

காலம் கடந்து
இழுக்காமல் விட்டுவிட்ட
தேரென நின்றிருந்தது
அந்த ஆலமரம்

பறவைகளின் கூட்டிசையின்
குரல்வளை அறுத்து 
பச்சையத்தில் குருதி
கலந்து நவீன ஓவியங்கள்
ஆலமரம் கலையரங்கம் ஆனது
கலைகள் செழித்து வளர்ந்தன