பவர் கட்...

கீழிருந்து
மேலாக இறங்குகிறது
இருட்டு
யாரும் உடன் இல்லை
தனிமையாய் உணரவில்லை

உடன் அழைத்து வந்த
வினோத குரல் கலவையின்
கெட்டித்தன்மை
ஆகிருதியை போல திடமாய் இருந்தது
அழைத்து வந்து அருகிருததி கொண்டேன்
ஆசுவாசமாய் இருந்தது

மரங்களின் இலைகளில் இசைத்த
ஒற்றை பானாழ் சுவரம் பிசகி
ஜதி தப்பி அடவிட்டது
சிதறிய மணிகள் சில்வண்டு
இரைச்சலென

பனையிலையில் வேய்ந்த கூரை
குடுகுடுப்பையாய்  குறி சொல்லியது
காற்றை நிரப்பிய குடுவையாய்
காதோரத்தில் ஓங்காரம்

பின்னி பழகிய கால்களின்
தடத்தில்  பிசுபிசுக்குகிறது
மையிருட்டு
ஒரு கூழாங்கல்லாய் புரட்டி விடுகிறது

தட்டு தடுமாறி
தலைகுப்புற விழுந்தேன்
படுக்கையை உதறிப்போட
நிலவும் இன்னும் சில
நட்சத்திரங்களும் உதிர்ந்தன

இரவு விழித்திருந்தது காவலாய்...
உறங்கி போனேன்!!