அதை ஏன் கேக்குற...

நெடுகப்பந்தல் இட்டு

நெய்யூற்றி பொங்கல் வைத்து
குலவையும், குங்குமமும்
அப்பி கிடக்கும்
கோயில் திண்ணையில்
சுருண்டு உறங்கும்
நாய்க்கு பண்டிகை நாளெல்லாம்
பகல் தூக்கம் ஓடிவிடும்


அயர்ந்து உறங்கும்
நாயின் வாயில் வடியும்
எச்சிலில் மிஞ்சிய
எலும்பின் மஞ்சைகளை தேடும்
காக்கைகள்
முற்பகலின் நிழல்களாய் திரியும்
மற்ற நாட்களில்

பால் மாரு குலுங்க
பகட்டு புட்டம் ஆட்டி
வால் ஒடுக்கி ஒதுங்கி போகும்
கருப்பு கண்ணழகியை
கனவில் புணரும் நாய்
கால் உதைத்து முனகும்
பெருங்கனவின்
அழைப்பு மணி விடாது கேட்கும்

பின்னங்கால்கள் தரையில்
இழுக்க வயிற்றுப்பகுதியின்
அரிப்பை தேய்த்து
இடம்பெயர்க்கும் நாய்
மோப்பக்குழையும் நாளில்
குறி மறந்து தூங்கும்

சீமை நாயென்று
சேரவிடாத எஜமானரின்
வீம்பில்
விரைகள் குலுங்க ஓடும்
பொழுதுகளின் பற்களில்
சிக்கி நசுங்கும் நாய்களின்
கிரியைகளில்
நாரத்தங்காய் காய்த்து தொங்கும்