ஒரு அந்தியும், நானும் இரண்டு புறாக்களும்

ஒரு அந்தி,
இரண்டு புறாக்கள்.
ஒன்றை மற்றொன்று
துரத்தி மாடியின்
கைப்பிடி சுவரில் நகர்ந்து கொண்டே
கூழாங்கற்களை உருட்டுகிறது குரலில்

பெட்டை தன் பின் கொசுவ
இறகுகளை விரித்து கொண்டே
முன் செல்கிறது
பின்னால் செல்வது
ஆண் புறாவாய் இருக்கக் கூடும்

ஒரு வினோத சப்தம் எழுப்பி
தண்ணீர் தொட்டியின் அடியில் செல்கிறது
பறக்க எத்தனிக்கவில்லை
முகிழ்ச்சியும் நிகழ்ந்தபாடில்லை
விழிகளை உருட்டி உருட்டி
சுற்றுமுற்றும் பார்க்கிறது

பார்த்துக் கொண்டிருக்கிறேன்
கலவியோ கவிதையோ
வாய்க்க பெறுவது என்னவென்று தெரியாமல்